Presidenti i SHBA-së, Donald Trump, ka lënë të kuptohet se Irani ka miratuar gjerësisht një plan 15-pikësh të Shteteve të Bashkuara për t’i dhënë fund luftës në Lindjen e Mesme. I pyetur në bordin e avionit presidencial Air Force One, ai u përgjigj: “Na kanë dhënë shumicën e pikave. Pse të mos e bënin?”. Trump nuk dha detaje të mëtejshme mbi lëshimet e Republikës Islamike.
Sipas Trump-it, Irani ka rënë dakord të lejojë 20 anije të ngarkuara me naftë të kalojnë përmes Ngushticës së Hormuzit. Nisja parashikohet të hënën në mëngjes dhe do të zgjasë disa ditë. Ai e cilësoi këtë si “shenjë respekti” nga Teherani dhe shtoi: “Po përparojmë shumë mirë në negociata, por kurrë s’e di çfarë mund të ndodhë me Iranin. Në fund, ndoshta duhet t’i godasim përsëri nga ajri.”
Bisedimet në Pakistan
Ministri i Jashtëm i Pakistanit, Ishaq Dar, njoftoi të dielën se bisedimet midis SHBA-së dhe Iranit për luftën në Lindjen e Mesme priten së shpejti. Pakistani do të jetë vendi mikpritës. Dar nuk specifikoi nëse negociatat do të jenë drejtpërdrejta apo indirekte.
Spekulimet për ishullin Charg
Donald Trump ka spekuluar rreth mundësisë së marrjes së ishullit iranian Charg nga trupat amerikane. Në një intervistë për Financial Times, të publikuar në mesnatën e së hënës, ai tha: “Ndoshta e marrim Charg-un, ndoshta jo. Ne kemi shumë opsione. Kjo do të thoshte se do të duhej të qëndronim atje për një kohë.”
Ishulli Charg, në Gjirin Persik, konsiderohet porti më i rëndësishëm i naftës për Republikën Islamike. Para luftës, përmes terminalit të cisternave aty eksportoheshin pothuajse të gjitha naftet e papërpunuar iraniane.