Presidenti amerikan Donald Trump deklaroi se Shtetet e Bashkuara duhet të rishikojnë anëtarësimin e tyre në NATO, ndërsa kritikoi aleatët për mungesën e ndihmës në luftën kundër Iranit. Kjo deklaratë u bë para gazetarëve në Shtëpinë e Bardhë më 17 mars 2026.
Trump tha se anëtarësimi në NATO është “sigurisht diçka për të cilën duhet të mendojmë”. Ai theksoi se SHBA-ja nuk ishte e detyruar të ndihmonte kur Rusia pushtoi Ukrainën, duke e barazuar në njëfarë mënyre atë konflikt me luftën në Iran.
“Ne i ndihmuam ata, por ata nuk na ndihmuan neve, dhe mendoj se kjo është shumë e keqe për NATO-n”, u shpreh Trump. Ai shtoi se aleatët mbështesin qëllimin e SHBA-së për të ndaluar Iranin të marrë armë bërthamore, por janë të ngurruar të përfshihen drejtpërdrejt.
“Askush nuk dëshiron që Irani të ketë armë bërthamore sepse këta njerëz janë të çmendur, absolutisht të çmendur, të egër dhe dhunues. Të gjithë pajtohen me këtë, por nuk duan të ndihmojnë”, deklaroi 79-vjeçari. Ai vuri në dukje se SHBA-ja duhet ta mbajë në mend këtë sjellje.
Kur u pyet për ndëshkime ndaj NATO-së, Trump u përgjigj “Jo. Thjesht mendoj se nuk është mirë për një partneritet kur ata thonë: ‘ajo që po bëni është një gjë e madhe, por ne nuk do të ndihmojmë’”. Shumica e shteteve kryesore të NATO-së kanë deklaruar se nuk dëshirojnë të marrin pjesë në luftën kundër Iranit.