Donald Trump, presidenti i Shteteve të Bashkuara, zhvilloi një takim urgjent në Qendrën e Operacioneve ose Dhomën e Situatave të Shtëpisë së Bardhë, për të diskutuar zhvillimet në Ngushticën e Hormuzit dhe ecurinë e negociatave me Iranin.
Lëvizja e Teheranit për të rikthyer kufizimet në kalimin përmes ngushticës, si dhe raportimet për sulme ndaj anijeve tregtare, erdhën më pak se 24 orë pasi Trump deklaroi se një marrëveshje për t’i dhënë fund krizës mund të arrihej "brenda një ose dy ditësh".
Sipas një zyrtari të lartë amerikan, të cituar nga Axios, mungesa e përparimit të shpejtë në negociata mund të çojë në rifillim armiqësish në ditët në vijim. Trump ka paralajmëruar se SHBA nuk do të lejojë "shantazh" nga Teherani dhe se bisedimet vazhdojnë, me pritshmëri për vendim brenda ditës.
Në takim morën pjesë:
- Zëvendëspresidenti J.D. Vance, i cili pritet në raundin e ardhshëm të bisedimeve;
- Sekretari i Shtetit Marco Rubio;
- Sekretari i Mbrojtjes Pete Hegseth;
- Sekretari i Thesarit Scott Bessent;
- Shefja e Shtabit të Shtëpisë së Bardhë Susie Wiles;
- I dërguari special Steve Witkoff;
- Drejtori i CIA-s John Ratcliffe;
- Kryetari i Shefave të Përbashkët të Shtabit Dan Caine.
Shtëpia e Bardhë nuk ka dhënë ende një koment zyrtar mbi takimin.