Vala e fundit e protestave në Shqipëri, të cilat kërkojnë anulimin e një projekti turistik në zonën e mbrojtur të lagunës së Nartës dhe dorëheqjen e kryeministrit Edi Rama, ka tërhequr vëmendjen e vizitorëve të huaj. Disa prej tyre janë përfshirë drejtpërdrejt në këto tubime, duke shprehur solidaritet me kauzat e qytetarëve.
Gabriel Bolling, një 22-vjeçar nga Florida, SHBA, u bë pjesë e protestave në Tiranë. Videoja ku ai shfaqet mes protestuesve është parë mbi 280 mijë herë brenda 12 orëve. Ai e cilësoi përvojën si transformuese, duke e vlerësuar lëvizjen si paqësore dhe shpresëdhënëse.
Gjithashtu, Brett Pavel, 74-vjeç nga Kolorado, SHBA, mori pjesë në protestën e organizuar në Durrës bashkë me bashkëshorten e tij. Me një pankartë ku shkruhej "Shpëtoni Nartën", ai deklaroi se mbështet të drejtën e shqiptarëve për të mbrojtur vendin nga interesat private dhe për të ruajtur thesaret natyrore. Ai ka planifikuar të marrë pjesë edhe në tubime të tjera gjatë qëndrimit të tij në Vlorë dhe Durrës.
Kryeministri Edi Rama ka pretenduar se protestat po dëmtojnë turizmin dhe po shkaktojnë anulime. Megjithatë, pjesëmarrja e turistëve në këto lëvizje po përdoret nga organizatorët si dëshmi e mbështetjes ndërkombëtare për mbrojtjen e mjedisit dhe vlerave demokratike në vend.