Ueb-faqja zyrtare e dedikuar për konsumatorët, konsumatori.rks-gov.net, është bërë cak i një sulmi kibernetik. Lajmi është konfirmuar nga Ministria e Industrisë, Ndërmarrësisë, Tregtisë dhe Inovacionit (MINT), e cila njoftoi se incidenti ka bërë që faqja të mos jetë funksionale për momentin.
Institucionet përkatëse kanë bërë të ditur se janë duke punuar për rikthimin dhe funksionalizimin e plotë të saj. Deri në zgjidhjen e kësaj situate, për të mos ndërprerë shërbimet ndaj qytetarëve, ministria ka ofruar kanale alternative të komunikimit për adresimin e ankesave dhe kërkesave:
- Adresa elektronike: konsumatori@rks-gov.net
- Numri i kontaktit (Viber): +383 (0) 46 311-000
Në njoftimin e saj, MINT ka falënderuar qytetarët për mirëkuptimin e treguar. Deri më tani, nuk janë dhënë detaje shtesë lidhur me natyrën e sulmit, autorët e mundshëm apo rrezikun e mundshëm ndaj të dhënave të përdoruesve që mund të kenë qenë të regjistruara në këtë platformë.