Ministria e Industrisë, Ndërmarrësisë, Tregtisë dhe Inovacionit (MINTI), përmes Inspektoratit Qendror të Mbikëqyrjes së Tregut (IQMT), ka shqiptuar 18 gjoba ndaj KEDS-it në vlerë totale 90 mijë euro. Gjobat u dhanë për 18 njehsorë elektrikë të verifikuar, ku u konstatua skadimi i afatit të vlefshmërisë.
Gjatë muajit prill 2026, MINTI ka vazhduar verifikimin e ankesave të konsumatorëve lidhur me parregullsitë në njehsorët elektrikë. Komisioni ad hoc, i krijuar posaçërisht për këtë çështje, ka pranuar 574 ankesa të mbështetura me dëshmi për devijime në orë dhe datë.
Nga konsumatorët janë tërhequr 54 njehsorë elektrikë në 7 rajone të Republikës së Kosovës. Këta njehsorë u nënshtruan testimit laboratorik në Agjencinë e Metrologjisë së Kosovës (AMK), ku në 38 prej tyre u konstatuan devijime kohore.
Ankesat e mbështetura me dëshmi për devijime kohore po përcillen te KESCO, nga e cila kërkohet kompensim i menjëhershëm për konsumatorët e dëmtuar. Raportet zyrtare të komisionit verifikues do të dorëzohen te organet e drejtësisë si prova për procedurat hetimore të nisura.
Prokuroria Themelore në Prishtinë ka autorizuar Policinë për veprime hetimore lidhur me dyshimet për parregullsi në njehsorët e KEDS-it, të cilët dyshohet se nuk masin saktë energjinë e shpenzuar. MINTI paralajmëron vazhdimin e verifikimeve dhe gjobave gjatë majit. Konsumatorët mund të dërgojnë ankesat me dëshmi në Viber-in +383 46 311 000 ose në adresën elektronike konsumatori@rks-gov.net.
Përditësime
MINTI imponoi gjobën e dytë ndaj KEDS-it, në vlerë 90.000 euro për njehsorë me afat të skaduar.
- Gjoba e parë: 30.000 euro për 6 njehsorë në mes të prillit.
- KEDS premtoi të dëmshpërblejë konsumatorët e dëmtuar.
- LDK dhe media Nacionale zbuluan parregullsitë me rreth 2.000 mostra.
MINTI ka gjobitur KEDS-in për herë të tretë këtë vit me 90 mijë euro për njëhsorë me afat të skaduar.
ZRRE deklaron se nuk ka ankesa zyrtare për faturat dhe tarifat ndjekin vendimet në fuqi.
KESCO sqaron se faturat llogariten automatikisht në mënyrë digjitale dhe këshillon kujdes me blloktarifën.
Tarifat specifike:
- Ditë: 9.05 centë/kWh deri në 800 kWh, 15.43 centë/kWh mbi.
- Natë: 3.88 centë/kWh deri në 800 kWh, 7.28 centë/kWh mbi.
Periudhat e tarifës së ulët: dimër 22:00-07:00, verë 23:00-08:00.
IQMT dhe Komisioni Ad Hoc zhvilluan sot aksione verifikimi në Prishtinë dhe Ferizaj.
Ata sekuestruan njëhësorë me devijime në orë dhe datë, dhe iniciuan dy procedura të reja gjobitëse ndaj KEDS-it për njëhësorë me afat të skaduar.
Verifikimet do të shtrihen në të gjithë Kosovën në ditët në vijim.