Ministria e Industrisë, Ndërmarrësisë, Tregtisë dhe Inovacionit (MINTI), përmes Agjencisë së Metrologjisë së Kosovës dhe Inspektoratit Qendror të Mbikëqyrjes së Tregut, ka vazhduar aksionet e kontrollit në terren. Gjatë inspektimeve të fundit, janë gjetur pesë njehsorë elektrikë që nuk plotësonin kushtet metrologjike për shkak të skadimit të afatit të verifikimit, duke çuar në ndëshkimin financiar të operatorit KEDS.
Procesi i mbikëqyrjes nisi pas ankesave të shumta të konsumatorëve lidhur me mospërputhjen e orës në njehsorët elektrikë. Për këtë qëllim, më 31 mars 2026 u themelua një komision i posaçëm nga MINTI, ndërsa procesi i verifikimit filloi më 1 prill 2026. Gjoba e parë ndaj KEDS-it u shqiptua më 14 prill 2026 në vlerë prej 6 mijë eurosh. Deri më tani, institucionet kishin shqiptuar gjashtë gjoba me një vlerë totale prej 311 mijë eurosh, ndërsa me gjobën e fundit shuma arrin në 336 mijë euro.
Kompensimi i konsumatorëve
Sipas ZRrE-së, qytetarët që vërtetohet se janë dëmtuar nga devijimet metrologjike do të kompensohen plotësisht. Procedura për të përfituar kompensimin përfshin këto hapa:
• Paraqitja e ankesës në MINTI;
• Adresimi i ankesës te KEDS;
• Në rast mosmarrëveshjeje, çështja dërgohet për shqyrtim në ZRrE.
Megjithatë, deri në fillim të muajit qershor, KESCO nuk ka bërë të ditur afatet për nisjen e procesit të kthimit të mjeteve për konsumatorët e prekur. MINTI u ka bërë thirrje qytetarëve që të vazhdojnë t'i raportojnë dyshimet e tyre përmes numrit në Viber +383 (0) 46 311 000 ose përmes adresës elektronike konsumatori@rks-gov.net.