Në një deklaratë zyrtare, Unioni i Gazetarëve Shqiptarë (UGSH) ka dënuar agresionin verbal dhe fizik të ushtruar ndaj gazetarëve, operatorëve dhe punonjësve të tjerë të mediave, si dhe ndaj automjeteve të tyre, gjatë protestës së zhvilluar këtë të enjte para godinës së Parlamentit. Sipas UGSH, sulmet mbi mjetet e punës, si mikrofonat me logo dhe kamerat, përbëjnë veprime të papranueshme dhe kriminale.
UGSH ka kërkuar ndërhyrjen e menjëhershme të Policisë së Shtetit për të garantuar sigurinë e punonjësve të medias dhe për të vënë para përgjegjësisë ligjore çdo person që ushtron shantazh, intimidim ose dhunë fizike. Në deklaratë theksohet se profesionistët e medias kanë qenë të identifikuar qartë me dokumentet dhe simbolet profesionale gjatë gjithë kohës së zhvillimit të protestës.
Sindikata u ka bërë thirrje organizatorëve të protestës, të shpallur apo të paidentifikuar publikisht, që të mbajnë përgjegjësi për aktet rrugaçërore dhe pengimet e shpeshta ndaj stafeve mediatike në terren. UGSH u ka kërkuar kolegëve të dokumentojnë dhe të publikojnë çdo agresion të ushtruar ndaj tyre, me qëllim denoncimin e autorëve. Gjithashtu, përfaqësuesit e UGSH-së u janë drejtuar Drejtorit të Përgjithshëm të Policisë së Shtetit dhe Ministrit të Brendshëm për të siguruar ushtrimin e lirë dhe të sigurt të profesionit të gazetarisë në vend.