Urim Meta, 46-vjeçar, u arrestua në rrugën e fshatit Shëngjergj, në kuadër të operacionit “Synimi”. Ai udhëtonte drejt Tiranës kur policia kryen kontrollin në automjetin e tij. Gjatë kontrollit iu gjetën dhe sekuestruan 4 kallëpe tritoli, 2 armë zjarri dhe rreth 1500 fishekë të kalibrave të ndryshëm.
Gjatë marrjes në pyetje nga grupi hetimor, Meta pranoi përfshirjen në trafikun e armëve. Ai deklaroi se e bëri për shkak të vështirësive ekonomike. “Tani që më kapët e pranoj gabimin. Jam marrë me trafikun e armëve sepse kisha nevojë për para. Doja të ndërtoja një shtesë te banesa ime”, tha ai para hetuesve.
Sipas dëshmisë së tij, armët dhe municionet do shiteshin për 4 mijë euro, ndërsa secili kallëp tritoli për 500 euro. Porosia erdhi nga një ndërmjetës, me destinacion Maqedoninë e Veriut. Meta mori 400 euro si paradhënie dhe pjesën tjetër do ta merrte pas dorëzimit.
Hetuesit dyshojnë se Meta është i përfshirë edhe në episode të tjera të trafikimit të armëve zjarri dhe kallëpeve tritoli. Hetimet vijojnë për identifikimin e personave të tjerë të dyshuar dhe dokumentimin e plotë të aktivitetit kriminal.