Ditë më parë, një paciente 63-vjeçare, L. Gj., ka humbur jetën në Urgjencën e Spitalit të Elbasanit. Vajza e saj, E. T., ka paraqitur kallëzim penal në polici kundër dy mjekeve E. R. dhe Xh. T., duke pretenduar se vdekja e nënës erdhi nga mjekimi i pakujdesshëm.
Policia e Elbasanit konfirmoi se ka marrë denoncimin në Komisariat dhe ka referuar materialet në Prokurorinë vendore. Aty ka nisur procedim penal ndaj dy mjekeve, të cilat ushtrojnë detyrën në Urgjencën e këtij spitali.
Sipas dëshmisë së denoncueses dhe verifikimeve fillestare, dyshohet se ngjarja ka ndodhur për shkak të pakujdesisë gjatë trajtimit mjekësor. Policia njofton se po punohet për sqarimin e rrethanave dhe përcaktimin e shkakut të saktë të vdekjes.
Hetimet për zbardhjen e plotë të ngjarjes i kaluan Prokurorisë së Elbasanit.