Gjyqtarët Valentina Sopjani dhe Agron Maxhuni janë zgjedhur anëtarë të rinj të Këshillit Gjyqësor të Kosovës (KGJK) nga radhët e gjykatave të shkallës së parë. Procesi zgjedhor u zhvillua të martën gjatë një tubimi qendror, pas prezantimit të vizioneve nga katër kandidatët në garë.
Sipas të dhënave zyrtare, nga 354 gjyqtarë me të drejtë vote, në proces morën pjesë 303 prej tyre, ku një fletëvotim u shpall i pavlefshëm. Rezultatet për kandidatët ishin si më poshtë:
• Valentina Sopjani: 212 vota
• Agron Maxhuni: 204 vota
• Ilir Bytyqi: 84 vota
• Diora Bajrami: 64 vota
Valentina Sopjani dhe Agron Maxhuni do ta ushtrojnë detyrën e anëtarit të KGJK-së duke filluar nga data 8 korrik, pas përfundimit të mandatit të anëtarëve aktualë.
Zgjedhja u bazua në Rregulloren 09/2019 për procedurën dhe kriteret e zgjedhjes së anëtarëve të KGJK-së nga radhët e gjyqësorit. Aktualisht, KGJK-ja ka 11 anëtarë nga 13 sa parashihet të ketë gjithsej. Procesi për plotësimin e pozitave të tjera është në vijim, duke përfshirë zgjedhjen e një anëtari nga Kuvendi i Republikës së Kosovës dhe procedurat për anëtarin nga radhët e Gjykatës Supreme.