Marco van Basten ka shprehur kritika të ashpra ndaj pronarëve të huaj të klubeve italiane, në një intervistë për gazetarin Carlo Pellegatti, gjatë prezantimit të librit të tij „50 ndeshje, emocione të pambarimta, Milani”.
Sipas legjendës holandeze, këta pronarë nuk kanë lidhje me historinë e klubeve dhe interesohen vetëm për veten. "Aktualisht ka shumë pronarë të huaj në Itali që nuk kanë të bëjnë fare me historinë e klubeve. Do të ishte shumë e rëndësishme që futbolli italian të kthehej në duart e italianëve, në mënyrë që të kthehet në majën e Evropës", tha ai.
Ai mori si shembull Milanin, klubin me të cilin fitoi Topin e Artë në 1988. "Një shembull është Milani, që nuk është më ai që ka qenë. E ndjek dhe shpresoj që ta rimarrë veten shpejt, sepse sot Interi po dominon në Itali dhe kjo nuk më pëlqen aspak", shtoi van Basten.
Për kombëtaren italiane, ish-sulmuesi vuri në dukje mungesën e yjeve në pozicionet kryesore. "Italia gjithnjë ka pasur një portier të madh, një mbrojtës të madh, një mesfushor të madh dhe një sulmues të madh. Sot është e vështirë t’i shohësh dhe është e çuditshme. Dikur futbolli italian komandonte botën, sot nuk është kështu", u shpreh ai.
Në fund, van Basten deklaroi se do të mbështesë Holandën në Botëror, por nuk pret shumë. Si alternativë, zgjedh Brazilin e drejtuar nga miku i tij Carlo Ancelotti.