Prej tre ditësh, një vatër zjarri në Parkun Kombëtar të Llogarasë mbetet aktive, duke mbajtur në gatishmëri autoritetet. Flakët janë lokalizuar në një zonë pyjore, poshtë hapësirës ku ndodhen antenat.
Sfidë kryesore për ekipet e ndërhyrjes mbetet djegia e shtresës së humusit nën tokë. Ky fenomen bën që vatra të riaktivizohet në mënyrë të përsëritur, edhe kur duket se flakët në sipërfaqe janë shuar.
Për të përballuar situatën, rreth 20 efektivë të Forcave të Armatosura janë angazhuar në terren krah punonjësve të Administratës së Zonave të Mbrojtura (ADZM) dhe shërbimit zjarrfikës.
Autoritetet e vlerësojnë situatën si të paparashikueshme, për shkak të rrezikut të përhapjes së flakëve në sipërfaqe të tjera të parkut, nëse vatra nuk vihet plotësisht nën kontroll.
Përditësime
Kryetarja e Bashkisë Vlorë konfirmoi shuarjen e zjarrit në Parkun Kombëtar të Llogarasë, ndërsa ekipet operacionale mbeten në terren për monitorim. Ndërkohë, po punohet për shuarjen e një vatre të re të shfaqur në fshatin Pilur, Bashkia Himarë.