Gjatë pasdites së të mërkurës, dy vatra zjarri janë raportuar në zona të ndryshme, duke kërkuar angazhimin e ekipeve të emergjencave civile.
Në fshatin Voskopojë, në vendin e quajtur “Antenat”, zjarri ka vënë në lëvizje forcat e Shërbimit të Mbrojtjes nga Zjarri dhe Shpëtimit (MZSH), Njësisë Administrative Voskopojë dhe Shërbimit Pyjor. Sipas informacioneve paraprake, drejt vendngjarjes janë dërguar dy mjete, një automjet zjarrfikës dhe një mjet tip “pick-up”. Operacioni po ndeshet me vështirësi për shkak të terrenit, i cili pamundëson afrimin e mjeteve të rënda deri në pikën e zjarrit, duke detyruar efektivët të vazhdojnë ndërhyrjen në këmbë.
Njëkohësisht, një tjetër vatër zjarri është raportuar në kodrat pranë Selishtës në Cakran. Flakët kanë përfshirë një sipërfaqe me ullishte, pemë dhe shkurre. Pavarësisht erës së fortë që ka vështirësuar punën, 3 mjete zjarrfikëse janë angazhuar në terren për izolimin dhe shuarjen e flakëve. Autoritetet vijojnë monitorimin e situatës në të dyja zonat për të parandaluar përhapjen e mëtejshme të zjarreve.