Një ngjarje tragjike ka ndodhur në komunën e Suharekës, ku një 26-vjeçar ka humbur jetën si pasojë e goditjes nga rrufeja. Ngjarja është regjistruar në një zonë të thellë malore midis bjeshkëve të Bukoshit dhe Dellocit.
Rastin e ka konfirmuar zëdhënësi i Policisë së Kosovës për rajonin e Prizrenit, toger Shaqir Bytyqi. Sipas njoftimit zyrtar, më datën 1 korrik 2026, rreth orës 17:23, Qendra e Emergjencës së Suharekës ka njoftuar policinë se në afërsi të vendit të quajtur Guri i Dellocit ishte gjetur një person pa shenja jete, i cili dyshohet se u godit nga rrufeja. Rasti ishte denoncuar fillimisht nga banorë të fshatit Delloc.
Patrullat policore dhe ekipet e hetuesisë ndërmorën një ndërhyrje në një terren malor mjaft të vështirë për të arritur në vendin e ngjarjes. Me të mbërritur atje, ekipi mjekësor i Emergjencës së Suharekës konstatoi vdekjen e shtetasit F.B., rreth 26 vjeç.
Prokurori kujdestar është njoftuar për këtë ngjarje, ndërsa Sektori Rajonal i Hetimeve, në bashkëpunim me Prokurorin e Shtetit, po vijon procedurat për zbardhjen e plotë të rrethanave të rastit.
Përditësime
Trupi i pajetë i 26-vjeçarit është dërguar në Institutin e Mjekësisë Ligjore (IML) në Prishtinë për obduksion, me qëllim zbardhjen e rrethanave të vdekjes nga goditja e rrufesë.