Vëllai i Erona Coklit, Drilon Cokli, mori pjesë më 7 nëntor në protestën kundër vrasjes së grave në Prishtinë. Ai ndau dhimbjen e familjes për humbjen e motrës dhe kërkoi drejtësi për të dhe për gratë e tjera të vrara. Cokli tha se familja nuk është e kënaqur me dënimin prej 24 vitesh burgim të shqiptuar ndaj Valon Aliut.
Erona Cokli u vra më 12 prill 2024 nga ish-bashkëshorti i saj, Valon Aliu, brenda Qendrës për Punë Sociale në Ferizaj. Sipas burimeve, vrasja ndodhi pas një mosmarrëveshjeje për kujdestarinë e djalit të tyre. Në të njëjtin rast, Aliu plagosi vëllanë e Eronës dhe kanosi me vrasje një zyrtare të qendrës.
Në fjalimin e tij, Drilon Cokli tha se humbja e motrës ia ka ndryshuar jetën. Ai veçoi nipin e tij, i cili po rritet pa praninë e nënës, dhe pyeti se si mund t’i shpjegohet një fëmije që nëna nuk do të kthehet më.
“Ne si familje nuk jemi të kënaqur me dënimin prej 24 vitesh burg. Për ne, asnjë dënim nuk mund ta kthejë Eronën, por besojmë se jeta e saj meriton drejtësi dhe se dhimbja e familjes sonë duhet të dëgjohet”, tha ai. Cokli kërkoi që rasti të trajtohet me seriozitet dhe drejtësia të vihet në vend.
Ai u bëri thirrje qytetarëve që vrasjet e grave të mos shihen vetëm si lajme që harrohen pas disa ditësh. Sipas tij, pas çdo viktime mbeten familje, fëmijë që vuajnë, ëndrra të ndërprera dhe dhimbje që vazhdon.
Cokli përmendi edhe Arlinda Zekajn dhe kërkoi që emrat e saj, të Eronës dhe të grave të tjera të mos harrohen. Protesta ishte vazhdim i mobilizimeve qytetare pas vrasjes së Zekajt. Pjesëmarrësit kërkuan që institucionet të garantojnë mbrojtje efektive për gratë dhe vajzat në Kosovë.