Bashkia Vlorë ka formalizuar nënshkrimin e Paktit Ndërbashkiak për Punësimin, duke u shndërruar në njësinë e parë vendore që ndërmerr këtë hap. Nënshkrimi u zhvillua në kuadër të Forumit të tretë të Komunitetit dhe Biznesit për Migracionin dhe Diasporën, organizuar nga Organizata Ndërkombëtare për Migracionin (IOM) në Shqipëri, me mbështetjen e Qeverisë së Mbretërisë së Bashkuar.
Qëllimi i këtij pakti është krijimi i një strukture bashkëpunimi midis bashkive, Agjencisë Kombëtare të Punësimit dhe Aftësive (AKPA), institucioneve arsimore dhe sektorit privat. Ky mekanizëm synon të adresojë sfidat e tregut të punës përmes disa shtyllave kryesore:
• Përmirësimi i koordinimit për informacionin mbi tregun e punës.
• Lehtësimi i lëvizshmërisë së brendshme të fuqisë punëtore.
• Rritja e aksesit në shërbimet e punësimit për grupet në nevojë, si gratë, të rinjtë dhe migrantët e rikthyer.
Sipas drejtoreshës së IOM në Shqipëri, Alma Jani, kjo nismë shërben si urë bashkëpunimi për zhvillimin ekonomik vendor. Pakti pritet të zgjerohet gradualisht në të gjithë vendin, duke u nënshkruar fillimisht nga shtatë bashki pilote: Vlorë, Kamzë, Tiranë, Sarandë, Kukës, Dibër dhe Shkodër.