Një ngjarje tragjike është shënuar pasditen e së premtes në bregdetin e Vlorës, ku një 29-vjeçare ka humbur jetën pasi dyshohet se është mbytur në det. Ngjarja ka ndodhur në zonën e plazhit të Porto Novos, një pikë bregdetare e cila prej vitesh konsiderohet si një ndër më të rrezikshmet për shkak të rrymave të forta detare.
Viktima është identifikuar si Afërdita Xhilaj. Trupi i saj është nxjerrë nga uji dhe është transportuar fillimisht me gomone drejt Triportit, e më pas është dërguar në morgun e Spitalit Rajonal të Vlorës për kryerjen e veprimeve të mëtejshme mjeko-ligjore.
Policia e Vlorës ka mbërritur në vendin e ngjarjes dhe ka nisur procedurat hetimore. Aktualisht, uniformat blu po marrin në pyetje banorët dhe pushuesit që ndodheshin në zonë në momentin e tragjedisë, për të zbardhur rrethanat e plota të ngjarjes.