Ngjarja e rëndë ndodhi në orët e para të mëngjesit gjatë një operacioni për kapjen e Violand Braçellarit në zonën malore të fshatit Bodë, në Lozhan. Ndërsa forcat e policisë po i afroheshin stanit ku strehohej i kërkuari, ky i fundit hapi zjarr në drejtim të tyre. Si pasojë, humbi jetën në krye të detyrës efektivi Enea Mekolli, ndërsa mbeti i plagosur efektivi Edison Adri.
Violand Braçellari rezultonte person në kërkim prej vitit 2017 për llogari të policisë së Vlorës. Ai ishte dënuar me vendim të formës së prerë nga Gjykata e Korçës me rreth 10 vite burg për veprën penale "prodhim dhe shitje të narkotikëve", ndërsa ishte në proces gjyqësor edhe për akuza të tjera, përfshirë krime ndaj personit. Sipas të dhënave, autori njihej për rrezikshmëri të lartë dhe kishte shmangur arrestimin nga forcat RENEA në katër raste të mëparshme për shkak të terrenit të vështirë.
Pas shkëmbimit të zjarrit, shërbimet e policisë arritën të neutralizojnë dhe arrestojnë autorin, i cili mbeti i plagosur në dorë. Braçellari, ish-ushtarak, njihej në zonën e Maliqit për përfshirje në ngjarje të mëparshme kriminale.
Përditësime
Policia e Shtetit ka identifikuar dy efektivët e përfshirë në ngjarjen e rëndë në Maliq: Enea Mekolli, 34 vjeç, dhe Edison Adri, 36 vjeç. Pas transportimit me helikopter, të dy protagonistët, efektivi i plagosur dhe autori, po marrin trajtim mjekësor në Spitalin e Traumës dhe ndodhen jashtë rrezikut për jetën. Forcat e rendit e lokalizuan autorin pas fshehjes në një stan në Malin e Bodenit. Dosja hetimore dëshmon për një histori të mëparshme kriminale të autorit, përfshirë një procedim për 'plagosje të lehtë me dashje' në vitin 2024 dhe akuza për keqtrajtim. Po ashtu, provat e administruara, përfshirë komunikime dhe dokumentim fotografik, konfirmojnë përfshirjen e tij në kultivimin e kanabisit.