Pas operacionit policor në Lozhan të Maliqit, ku mbeti i vrarë efektivi i forcave të Shqiponjave, Enea Mekolli, dhe u plagos kolegu i tij, Edison Adri, grupi hetimor ka zbardhur detaje të reja lidhur me aktivitetin e 43-vjeçarit Violand Braçellari.
Gjatë kontrollit të ushtruar në banesën dhe stallat e Braçellarit, hetuesit sekuestruan një armë zjarri të llojit kallashnikov, e cila dyshohet se është përdorur kundër forcave të rendit, si dhe një sasi të konsiderueshme municioni luftarak. Përveç armatimit, autoritetet sekuestruan pajisje të ndryshme, përfshirë dylbi, dronë dhe radio-komunikimi të ngjashme me ato që përdor Policia e Shtetit. Këto pajisje janë dërguar për ekspertizë për të përcaktuar qëllimin e përdorimit të tyre.
Nga verifikimet e kryera, ka rezultuar se konflikti i Braçellarit me ligjin kishte nisur përpara këtij operacioni. Më 3 qershor, një çoban i punësuar prej 15 ditësh nga 43-vjeçari, kishte depozituar një kallëzim në polici. Sipas denoncimit, Braçellari e kishte kërcënuar me jetë dhe kishte refuzuar t’i shlyente pagesën për punën e kryer.
Hetimet kanë evidentuar gjithashtu se Braçellari ka pasur probleme të mëparshme me autoritetet. Në vitin 2004, kur ishte 21 vjeç, ai u paraqit për të kryer shërbimin ushtarak, por u largua nga reparti vetëm tri ditë pas rekrutimit. Ky rast është ndjekur me një procedim penal ndaj tij në atë periudhë.