Presidenti i Serbisë, Aleksandar Vuçiq, paralajmëroi në fillim të shkurtit se vendi i tij do të ketë "mijëra robotë të armatosur" nga Kina në paradën e ardhshme ushtarake gjatë vitit 2026. Në këtë mënyrë, sipas tij, shteti do të sigurohet edhe më shumë.
Më 2 shkurt, Vuçiq u përshëndet me Luka-n, një robot humanoid kinez, të prezantuar nga kompanitë Minth Group dhe AGIBOT Innovation në Qendrën Kulturore Kineze në Beograd. AGIBOT, e themeluar në 2023 në Shangai, merret me integrimin e inteligjencës artificiale dhe robotikës për prodhimin e robotëve të përgjithshëm, të cilët mund të mësojnë dhe të përshtaten për përdorim masiv dhe komercial.
Vuçiq përmendi synimin që gjatë 2026-s të nisë prodhimi i këtyre robotëve edhe në Serbi, si dhe mundësinë e blerjes së robotëve të armatosur nga Kina. Ai tha se për realizimin e këtyre synimeve i duhet të kërkojë ndihmë nga presidenti kinez Xi Jinping, mik i Serbisë.
Konsulenti në fushën e gjeopolitikës dhe sigurisë, Nikolla Lluniq, vlerëson se deklarata për mijëra robotë të armatosur duket më shumë si mesazh marketingu sesa plan real. Ai shton se ushtritë moderne ende nuk kanë robotë humanoidë të armatosur operacionalë në terren. Robotët kinezë përdoren kryesisht për mbikëqyrje dhe logjistikë, jo për zëvendësimin e ushtarëve në luftime.
Deri tani, asnjë institucion tjetër shtetëror nuk i ka konfirmuar këto deklarata. Ministria e Mbrojtës e Serbisë nuk iu përgjigj pyetjeve nëse ekziston një plan konkret për blerjen e robotëve të armatosur nga Kina ose nëse është konsultuar për këtë.
Ushtria serbe tashmë përdor armatim kinez, nga dronët luftarakë deri te sistemi raketor kundërajror FK-3. Bashkëpunimi ushtarak midis Beogradit dhe Pekinit zhvillohet pa pengesa.
Përditësime
Bashkëpunimi ushtarak midis Beogradit dhe Pekinit zhvillohet pa pengesa, pavarësisht paralajmërimeve nga Brukseli dhe Uashingtoni.
- Ekspertët vlerësojnë se blerja e disa qindra robotëve humanoidë kushton dhjetëra milionë dollarë.
- Mijëra robotë kushtojnë qindra milionë dollarë dhe kërkojnë infrastrukturë të avancuar për mirëmbajtje.
- Thellimi i bashkëpunimit ushtarak me Kinën mund të rrisë tensionet diplomatike me BE-në.