Një grup prej 5-6 të rinjsh ka shkuar rreth orës 21:28 të 7 majit në lokalin e Rexhep Ismailit në Sarandë, pranë karburantit të tij. Personat kishin konflikt me një banor të fshatit Gjashtë për çështje pronësie.
Në verandën e lokalit, personi me konflikt ndodhej në një tavolinë me Ismailin dhe tre persona të tjerë. Menjëherë ka nisur debat verbal, i cili u përshkallëzua në përplasje fizike me sende të forta mes palëve.
Dyshohet se të rinjtë nuk kishin si qëllim fillestar konfliktin me Ismailin. Pas goditjeve, ai u fut brenda lokalit, doli me armë zjarri tip Kallashnikov dhe hapi zjarr disa herë ndaj grupit.
Grupi kundërpërgjigjej me pistoletë, duke e qëlluar Ismailin një herë me plumb në kokë. Ai mbeti i vdekur në vend.
Policia ka shoqëruar 5 persona, të cilët priten të merren në pyetje. Hetimet vazhdojnë për zbardhjen e plotë të rrethanave.
Përditësime
Policia e Shtetit ka identifikuar Lulëzim Tabaku (L.T.) si dyshuarin kryesor për vrasjen e Rexhep Ismailit.
Në deklaratën zyrtare, policia njoftoi se:
- Ka sekuestruar Audi Q8-në e përdorur nga autorët.
- Po kërkon një të plagosur nga pala e autorëve në spitale.
- Ka siguruar pamje nga kamerat e sigurisë.
Grupi që hyri me forcë në lokal 'Vëllezërit Ismaili' numëronte rreth 10 persona, sipas disa burimeve (kundrejt 5-6 më herët). Ismaili ndërhyri për ta qetësuar situatën.
Policia e Shtetit identifikoi konfliktin fillestar mes Kostandin Vogli dhe Viktor Ruçi. Vogli u plagos nga të shtënat e Rexhep Ismailit dhe u dorëzua vetë. Grupi i dyshuar përfshin Lulzim Tabaku, Idriz Çela, Eljo Muço, Marjo Agalliu dhe Ermal Shkalla. Autoritetet gjetën një automjet të braktisur në fshatin Nivicë. Disa shtetas u shpallën në kërkim, ndërsa dyshohet se autori ka kaluar kufirin.