Agim Ismaili, ish-drejtor i përgjithshëm i burgjeve, dëshmoi para prokurorëve të SPAK-ut se mori dosjet e hakeruara nga kompjuterët e Prokurorisë së Posaçme përmes mikut të tij Zambak Gjoni, ish-drejtor i burgut të Vlorës. Këto dosje i kishte hakeruar Arnold Rrokaj, sipas hetimeve të SPAK-ut.
Ismaili deklaroi se komunikonte me Gjonin përmes aplikacionit WhatsApp, ku shkëmbenin lajme, konsiderata dhe humor. Një natë, Gjoni i dërgoi një material për hetimet ndaj Damian Gjiknuri. Ismaili e pa atë ndërsa punonte, e shpërndau duke menduar se ishte lajm nga mediat dhe më pas e lexoi, pa e diskutuar me të tjerët.
Ai e mori me humor pretendimin e Gjonit për burime në SPAK, duke mos besuar se Gjoni kishte aksesuar apo korruptuar punonjës të Prokurorisë së Posaçme. Ismaili mendoi se materialet kishin qarkulluar mes gazetarësh dhe Gjoni ia kishte ridërguar.
Lidhja me shkarkimin e Ismailit
SPAK evidenton se Ismaili u shkarkua nga pozicioni i drejtorit të përgjithshëm të burgjeve me vendim të Këshillit të Ministrave, bazuar në propozimin e Ministrit të Drejtësisë. Shkarkimi erdhi nga një memo e Drejtorisë së Auditimit pranë Ministrisë së Drejtësisë, lidhur me shkelje të konstatuara nga KLSH-ja në raportin nr. 1160/20 të datës 11.06.2021.
Ismaili i konsideron këto konstatime subjektive dhe të pavërteta. SPAK analizon komunikime ku Gjoni i thotë Ismailit se i ka kërkuar shokut të gërmojë në SPAK për Ulsi Manja-n, ish-ministër i Drejtësisë, dhe Ismaili përgjigjet "aaaaa do ishte e hatashme". Kjo, sipas SPAK-ut, dokumenton motivin personal të Ismailit për të kërkuar materiale inkriminuese ndaj Manjës, në lidhje me shkarkimin e tij.
Të tre të akuzuarit, Arnold Rrokaj, Zambak Gjoni dhe Agim Ismaili, po hetohen për hakerimin e kompjuterëve të SPAK-ut. Dosjet u zbardhën nga gazetarja Anila Hoxha e Top Channel.