Agim Ismaili, ish-drejtori i Burgjeve, u paraqit këtë të mërkurë në GJKKO, në zbatim të masës së sigurisë së vendosur nga SPAK. Paraqitja ndodhi në seancën paraprake për hetimin e sulmit kibernetik ndaj sistemit të SPAK-ut.
Ai akuzohet për veprat penale "Përgjimi i paligjshëm i të dhënave kompjuterike", të kryer në formën e bashkëpunimit të grupit të strukturuar kriminal, "Grupi i strukturuar kriminal", si dhe "Kryerja e veprave penale nga organizata kriminale dhe grupi i strukturuar kriminal".
Sulmi ndaj sistemit kompjuterik të SPAK-ut u krye më 12 mars 2025 dhe u zbulua disa ditë më vonë. SPAK njoftoi më 3 prill 2025 se adresat e email-eve të prokurorëve të posaçëm ishin vënë në shënjestër të një ndërhyrjeje të paligjshme, përfshirë edhe email-in e drejtorit Altin Dumani. Autorët arritën të merrnin disa informacione, por nuk mundën të aksesojnë sistemin e brendshëm apo dosjet hetimore.
Në hetimet fillestare u identifikuan dhe arrestuan dy persona: Zambak Gjoni, ish-drejtori i paraburgimit në Vlorë, dhe Arnold Rrokaj, ish-punonjës i Inspektoratit të Mbrojtjes së Territorit. Dyshohet se ata shpërndanë të dhënat te persona të tjerë, rolet e të cilëve po verifikohen ende nga SPAK.