Prokuroria e Posaçme kundër Korrupsionit dhe Krimit të Organizuar (SPAK) ka marrë në pyetje Dritan Palnikën, ish-sekretar i përgjithshëm në Ministrinë e Brendshme dhe në Ministrinë e Bujqësisë, në kuadër të hetimeve për sulmin kibernetik ndaj këtij institucioni.
Burimet konfirmojnë se Palnika ka lidhje të afërta familjare me Agim Ismailin, ish-drejtor i Përgjithshëm i Burgjeve. Ismaili akuzohet si anëtar i një grupi kriminal që dyshohet se ka kryer hakerimin e SPAK-ut dhe nxjerrjen e materialeve hetimore të lidhura me figura të politikës dhe biznesit. SPAK dyshon se Ismaili i ka kaluar materialet e siguruara nga hakerimi kushëririt të tij, Dritan Palnikës.
Për Agim Ismailin, Gjykata e Posaçme për Korrupsionin dhe Krimin e Organizuar (GJKKO) ka nisur procesin gjyqësor. Ai akuzohet për:
- përfshirje në veprimtari kriminale të strukturuar;
- ndërhyrje të paligjshme në sisteme kompjuterike;
- sigurim e shpërndarje të të dhënave hetimore.
SPAK e konsideron këto akuza pjesë të një skeme të organizuar për goditjen e institucioneve të drejtësisë.
Hetimet vijojnë për të zbardhur plotësisht rolin e personave të përfshirë dhe çdo lidhje të mundshme që ka ndikuar në realizimin dhe pasojat e këtij sulmi ndaj sistemit të drejtësisë.