Agim Ismaili, ish-drejtori i Burgjeve, u paraqit sot në Gjykatën e Posaçme Kundër Korrupsionit dhe Krimit të Organizuar (GJKKO), ku u mbajt seanca paraprake. Ai është i pandehur si anëtar i grupit kriminal për sulmin kibernetik ndaj Strukturës së Posaçme Kundër Korrupsionit dhe Krimit të Organizuar (SPAK).
Hetimi ndaj Ismailit zhvillohet për veprat penale “Përgjimi i paligjshëm i të dhënave kompjuterike”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Sulmi ndaj sistemit kompjuterik të SPAK-ut ndodhi më 12 mars dhe u zbulua disa ditë më vonë. SPAK njoftoi më 3 prill se kishte pasur ndërhyrje të paligjshme në adresat e email-ave të prokurorëve të posaçëm, përfshirë tentativën ndaj email-it të drejtorit Altin Dumani. Sipas njoftimit zyrtar, autorët morën disa informacione, por nuk arritën akses në dosjet hetimore të sistemit të brendshëm.
Sipas dosjes së SPAK-ut, Arnold Rrokaj, ish-punonjës i Inspektoratit të Mbrojtjes së Territorit (IMT), kryer hakerimin dhe i dërgoi materialet te Zambak Gjoni, ish-drejtori i paraburgimit të Vlorës dhe ish-zyrtar burgjesh, si dhe te Ismaili. Këta të fundit i shpërndanë më tej te persona të tjerë.
Rrokaj dhe Gjoni u identifikuan brenda 24 orësh dhe u arrestuan në prill 2025, ku vijojnë të mbajnë masën "arrest me burg". Ismaili është hetuar në gjendje të lirë. Hetimi verifikon edhe rolin e personave të tjerë në shpërndarjen e të dhënave.
Përditësime
Hetimi zbardh emrat e prokurorëve të synuar në hakerimin e SPAK-ut: Behar Dibra, Enkeleida Millonai dhe Elida Kaçkini.
Dyshohet se dokumentet e përfituara u shpërndanë tek dy gazetarë.
Konfirmohet se Rrokaj kishte aksesin e parë në materialet hetimore.