Ish-drejtori i Drejtorisë së Burgjeve Agim Ismaili u paraqit në Prokurorinë e Posaçme kundër Korrupsionit dhe Krimit të Organizuar (SPAK) të hënën, më 12 janar 2026. Ai u mor zyrtarisht i pandehur në nëntor të vitit 2025 për tentativën e hakërimit të adresave të email-eve të prokurorëve të SPAK-së. Hetimi ndaj tij zhvillohet për veprat penale "përgjimi i paligjshëm i të dhënave kompjuterike", "grupi i strukturuar kriminal" dhe "kryerja e veprave penale nga organizata kriminale dhe grupi i strukturuar kriminal".
Sulmi kibernetik ndaj sistemit kompjuterik të SPAK-së ndodhi më 12 mars 2025 dhe u zbulua disa ditë më vonë. SPAK njoftoi publikisht më 3 prill 2025 se kishte qenë në shënjestër të një ndërhyrje të paligjshme në adresat e email-eve të prokurorëve të posaçëm, duke përfshirë atë të drejtuesit të SPAK-së, Altin Dumani. Autorët arritën të merrnin disa informacione, por nuk mundën të ndërhynin në sistemin e brendshëm të SPAK-së apo të siguronin akses në dosjet hetimore.
Në fazën e parë të hetimeve, u identifikuan dhe arrestuan dy persona si përgjegjës kryesorë: ish-drejtori i paraburgimit të Vlorës, Zambak Gjoni, dhe ish-punonjësi i Inspektoratit të Mbrojtjes së Territorit, Arnold Rrokaj. Sipas SPAK-së, të arrestuarit dyshohen se kanë shpërndarë të dhënat e marra tek persona të tjerë, rol i të cilëve po verifikohet ende nga autoritetet. Paraqitja e sotme e Agim Ismaili lidhet me vazhdundjen e këtyre hetimeve.