Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet për procedimin penal nr. 277/1/1, të nisur më 2 korrik 2025, dhe ka dërguar dosjen për gjykim në Gjykatën e Posaçme të Shkallës së Parë. Të pandehur janë ish-drejtori i Përgjithshëm i Burgjeve Agim Ismaili, i hetuar në gjendje të lirë, si dhe Arnold Rrokaj dhe Zambak Gjoni, të cilët ndodhen në masën e sigurisë "arrest në burg".
Sipas njoftimit të SPAK, Arnold Rrokaj akuzohet për "hyrje të paautorizuar kompjuterike" (neni 192/b paragrafi 2) dhe "përgjim të paligjshëm të të dhënave kompjuterike" (neni 293/a paragrafi 2), në kuadër të grupit të strukturuar kriminal (nenet 28/4, 333/a dhe 334 të Kodit Penal). Ai ka aksesuar në mënyrë të paligjshme materiale hetimore të SPAK, një pjesë e të cilave i ka dërguar te Zambak Gjoni dhe Agim Ismaili.
Zambak Gjoni dhe Agim Ismaili akuzohen për "përgjim të paligjshëm të të dhënave kompjuterike" (neni 293/a paragrafi 2), të kryer në bashkëpunim me grupin e strukturuar kriminal, si dhe për "kryerjen e veprave penale nga organizata kriminale dhe grupi i strukturuar kriminal". Të dy kanë shpërndarë materialet te persona të tretë.
Hetimet nxjerrin në pah se Ismaili, pasi u njoh me përmbajtjen, i shpërndau të dhënat më tej dhe kërkoi thellimin e përgjimit për të dhëna specifike për persona të caktuar. Rrokaj dhe Gjoni u identifikuan dhe u arrestuan brenda 24 orëve, duke parandaluar shpërndarjen e mëtejshme të materialeve hetimore konfidenciale.
Ngjarja lidhet me hyrjen e paligjshme në sistemet informatike të SPAK, përfshirë email-et e prokurorëve, të raportuar rreth prillit 2025.