Një zbulim me vlera për trashëgiminë kulturore është regjistruar në fshatin Rromës, në Bashkinë Selenicë. Rrënojat e një çezme të periudhës së hershme osmane kanë dalë në dritë gjatë kryerjes së punimeve për ndërtimin e një depoje uji në këtë zonë.
Pas njoftimit nga banorët e zonës, specialistët e Drejtorisë Rajonale të Trashëgimisë Kulturore (DRTK) Vlorë kanë kryer verifikimet e nevojshme në terren dhe kanë dokumentuar strukturën e gjetur. Sipas ekspertëve, monumenti ruan elementë të rëndësishëm ndërtimorë, mes të cilëve tubacione qeramike për furnizimin me ujë, kanale shkarkuese, si dhe mure të ndërtuara me kombinim të gurit, tjegullave dhe llaçit të gëlqeres.
Bazuar në analizën paraprake të tipareve arkitekturore dhe fragmenteve të materialit qeramik të gjetur në vendngjarje, specialistët kanë përcaktuar se monumenti i përket periudhës së shekujve XV–XVI, kohë që përkon me fillimet e sundimit osman në rajon. Ky zbulim vlerësohet si një dëshmi e rëndësishme për historinë dhe zhvillimin e mëtejshëm të fshatit Rromës.
Institucionet e trashëgimisë kulturore kanë theksuar rolin thelbësor të bashkëpunimit të qytetarëve në këtë proces. Njoftimi i ardhur nga banorët bëri të mundur që DRTK Vlorë të ndërhynte në kohë për dokumentimin dhe ruajtjen e këtyre rrënojave historike, duke siguruar që mbetjet e kësaj strukture të trajtohen me vlerat që i përkasin trashëgimisë kulturore lokale.