Pas një informacioni të mbërritur në postën elektronike të Drejtorit të Përgjithshëm të Policisë së Shtetit, Skënder Hita, është zbuluar një sipërfaqe e mbjellë me bimë narkotike në fshatin Reç i Ri të Njësisë Administrative Velipojë. Operacioni i kontrollit të territorit çoi në asgjësimin e 7446 bimëve të dyshuara të llojit Cannabis Sativa.
Në vijim të masave disiplinore, janë pezulluar nga detyra tre punonjës të policisë, të cilët mbanin përgjegjësi për zonën:
- Bekim Lika, Kryekomisar, Shef i Komisariatit të Policisë Shkodër
- Zef Marku, Nënkomisar, Shef i Stacionit të Policisë Velipojë
- Samet Kadroji, Inspektor, Ndihmësspecialist i Policimit në Zonë
Drejtoria e Standardeve Profesionale ka nisur një hetim të thelluar administrativ për mangësitë në përmbushjen e detyrave. Përveç tre të pezulluarve, hetim disiplinor ka nisur edhe për dy punonjës të tjerë, përkatësisht Nënkomisar D. N. dhe Inspektor E. I., të cilët janë pjesë e grupit të kontrollit të territorit, por ndaj tyre nuk është marrë masa e pezullimit nga detyra. Autoritetet po vijojnë veprimet hetimore për identifikimin dhe kapjen e personave përgjegjës për kultivimin e bimëve narkotike.