Operacioni i zhvilluar nga Policia e Shtetit në Njësinë Administrative Velipojë çoi në identifikimin dhe asgjësimin e 7446 bimëve të dyshuara si Cannabis Sativa. Lidhur me këtë ngjarje, Ministri i Punëve të Brendshme, Besfort Lamallari, deklaroi se lufta kundër kultivimit të lëndëve narkotike mbetet prioritet i institucionit që ai drejton.
Ministri Lamallari vlerësoi punën e forcave policore në goditjen e këtij rasti, por konfirmoi se janë ndërmarrë masa administrative dhe disiplinore ndaj punonjësve të policisë, për të cilët ekzistojnë dyshime se nuk kanë përmbushur detyrat funksionale në monitorimin e territorit. Sipas deklaratës zyrtare, për çdo rast të tillë është kërkuar koordinim i menjëhershëm ndërmjet Polisë së Shtetit dhe Agjencisë së Mbikëqyrjes Policore për të garantuar llogaridhënie ligjore dhe profesionale.
Në mesazhin e tij, ministri theksoi se askush nuk është mbi ligjin dhe asnjë punonjës nuk do të përjashtohet nga përgjegjësia në rast të dështimit për të ushtruar detyrën. Ai u bëri thirrje qytetarëve që të vazhdojnë bashkëpunimin me organet ligjzbatuese dhe të denoncojnë çdo aktivitet të paligjshëm, duke e konsideruar këtë bashkëpunim si një element kyç për rritjen e sigurisë dhe efektivitetin e institucioneve.