Inspektorati i Trashëgimisë Kulturore ka hartuar një raport pas inspektimit në Çarshinë e Gjakovës, ku nxjerr në pah rrezikun e shuarjes së zejës së punimit të djepave, të njohur si zdrukthëtarët djepapunues apo kutixhitë.
Inspektorët Labërie Dakaj dhe Pajtim Zogaj kanë vizituar punëtorinë e zanatliut Ruzhdi Qarri, ku kanë konstatuar se kjo zeje mendohet të ketë filluar rreth vitit 1870 në familjen e tij. Të dhënat nga Qendra Rajonale e Trashëgimisë Kulturore në Gjakovë tregojnë se deri në vitet '70 funksiononin rreth 70 kutixhi në këtë qytet, por më pas numri ka rënë ndjeshëm.
Në punëtori punohen kryesisht djepat me motive të ndryshme, kutitë, sofra mesatare dhe punime të vogla artizanale me dekor. Megjithatë, raporti vë në dukje mungesën e një regjistri të personave që ushtrojnë këtë zeje në pjesë të ndryshme të Kosovës, si dhe mungesën e të dhënave për ruajtjen e teknikave tradicionale.
Ruzhdi Qarri nuk ka trashëgimtar që vazhdon punën dhe deklaron se punëtoria do të mbyllet në momentin kur mosha e shtyrë ta pengojë për ta ushtruar, çka praktikisht ka ndikim direkt në shuarjen e zejes. Krahas kësaj, zeje të tjera si ajo e nallbanxhinjve dhe kazanxhinjve tashmë janë shuar.
Raporti, i dërguar në fundvitin e kaluar Ministrisë së Kulturës dhe institucioneve vartëse, apelon për mbështetje shtetërore ndaj zanatlinjve për të ruajtur trashëgiminë kulturore. Mes rekomandimeve përmendet pagesa mujore për zejtarët.