Prej datës 4 qershor, 35-vjeçari Eglant Koçi është shpallur i humbur, ndërsa familjarët e tij kanë bërë denoncimin përkatës pranë autoriteteve policore. Hetimet për zbardhjen e ngjarjes janë duke vijuar, megjithatë ende nuk ka informacione konkrete mbi vendndodhjen e tij.
Gazetari Artan Hoxha, duke dhënë detaje mbi këtë rast, deklaroi se Koçi punonte si postier për pika të këmbimit valuator, duke transportuar para cash për llogari të këmbimit të kriptomonedhave. Sipas të dhënave, 35-vjeçari është parë për herë të fundit në zonën e Sheshit Wilson në Tiranë, moment pas të cilit telefoni i tij është fikur dhe çdo kontakt me të është ndërprerë.
Në lidhje me hetimin, është bërë e ditur se nuk është regjistruar asnjë lëvizje në llogaritë bankare të të zhdukurit. Një element tjetër i hetimit është gjetja e mjetit motorik që përdorej nga Koçi në zonën e 5 Majit. Sipas informacioneve, motori u gjet një ditë pas zhdukjes, pasi ishte lënë aty nga një person ende i paidentifikuar, i cili është larguar menjëherë pas lënies së mjetit.
Autoritetet dhe familjarët vazhdojnë kërkimet, ndërsa apelohet për çdo informacion që mund të ndihmojë në zbardhjen e ngjarjes. Ekspertët theksojnë se kalimi i kohës ndikon negativisht në shanset për gjetjen e personave të zhdukur në rrethana të tilla, duke ngritur alarmin mbi shtimin e rasteve të rrëmbimeve në vend.