Një zjarr i përmasave të mëdha ka rënë në kodrat e zonës së Llamanit, në jug të qytetit të Himarës, duke përfshirë kryesisht sipërfaqe me shkurre dhe bimësi. Flakët janë vënë re pranë antenave, ndërsa tymi ka mbuluar zonën përreth.
Në operacionin për shuarjen e flakëve janë angazhuar mbi 17 efektivë të shërbimit zjarrfikës, të mbështetur nga pesë mjete zjarrfikëse, forca të Policisë së Himarës dhe ekipet e Emergjencave Civile. Ndërhyrja e forcave të terrenit synon izolimin e zjarrit dhe parandalimin e afrimit të tij drejt zonave të banuara.
Sipas informacioneve nga terreni, situata paraqitet problematike për shkak të temperaturave të larta dhe erërave të forta, të cilat po ndihmojnë në përhapjen e flakëve. Autoritetet janë duke punuar për vënien e situatës nën kontroll, ndërsa shkaqet e rënies së zjarrit mbeten ende të paqarta.
Përditësime
Pushuesit vazhdojnë të qëndrojnë në plazhin e Llamanit, pavarësisht zjarrit dhe tymit të dendur në kodrat përreth. Autoritetet ende nuk kanë urdhëruar evakuimin e zonës.