Një zjarr i përmasave të konsiderueshme ka përfshirë fshatin Hekal në bashkinë Mallakastër, duke djegur një sipërfaqe prej disa hektarësh me shkurre dhe ullinj. Flakët u shfaqën fillimisht rreth orës 09:00, duke mobilizuar menjëherë shërbimin zjarrfikës të Ballshit.
Edhe pse vatra e parë u vu nën kontroll, erërat e forta të mesditës shkaktuan riaktivizimin dhe përhapjen e flakëve. Përballë kësaj situate, operacioni u intensifikua me pjesëmarrjen e zjarrfikësve të Mallakastrës dhe mbështetjen e reparteve nga Fieri. Për shkak të rrezikut për zonën e mbrojtur të Parkut Arkeologjik të Bylisit, u krye edhe një ndërhyrje nga ajri për të ndaluar avancimin e zjarrit drejt këtij monumenti historik.
Sipas të dhënave paraprake, zjarri dyshohet se mund të jetë shkaktuar nga pakujdesia gjatë djegies së barit të thatë për pastrimin e tokave bujqësore. Policia e Mallakastrës ka nisur veprimet hetimore për zbardhjen e plotë të rrethanave dhe identifikimin e personit përgjegjës. Ndonëse zjarri është shuar pas disa orësh, ekipet e emergjencës po vijojnë monitorimin e terrenit për të parandaluar çdo riaktivizim të mundshëm gjatë natës, për shkak të kushteve atmosferike dhe erës së fortë që vazhdon të mbetet faktor rreziku.
Përditësime
Zjarri që shpërtheu pranë rrugës rurale Hekal-Klos ka depërtuar brenda perimetrit të Parkut Arkeologjik të Bylisit. Drejtori i Shërbimit Zjarrfikës të Mallakastrës, Mandi Aliaj, konfirmoi se situata është nën kontroll dhe rreziku është neutralizuar pas ndërhyrjes së forcave në terren. Operacioni u zhvillua nga 40 forca operacionale, të mbështetura nga 8 automjete zjarrfikëse, 2 autobote dhe trupa të Forcave të Armatosura.