Mbrëmjen e 3 korrikut 2026, një zjarr ka përfshirë një sipërfaqe të konsiderueshme me shkurre dhe bimësi në malin e Shëngjinit, pranë lagjes Sake. Përhapja e shpejtë e flakëve është favorizuar nga bimësia e dendur dhe e tharë në këtë zonë.
Në vendngjarje kanë mbërritur menjëherë forcat e shërbimit zjarrfikës dhe strukturat e emergjencave të Bashkisë Lezhë, të cilat po ndërhyjnë për izolimin dhe shuarjen e zjarrit.
Në lidhje me situatën, burime të ndryshme raportojnë se flakët ndodhen pranë zonës së banuar dhe rrugës kryesore, duke rritur shqetësimin për sigurinë e banorëve dhe drejtuesve të mjeteve. Megjithatë, informacionet zyrtare konfirmojnë se deri në këto momente zjarri nuk paraqet rrezik për banesat dhe qarkullimi i automjeteve në aksin kryesor vijon normalisht.