Zjarr në një pallat 30-katësh në zonën e Golemit

Një zjarr ka rënë pasditen e së hënës, më 3 Gusht 2026, në një pallat 30-katësh në zonën e Golemit, në bregdetin e Durrësit. Flakët kanë përfshirë një apartament brenda këtij objekti, i cili cilësohet si një nga ndërtesat më të larta në atë zonë. Në vendngjarje kanë mbërritur menjëherë forcat e zjarrfikëses për të bërë të mundur shuarjen e flakëve. Megjithatë, ndërhyrja po kryhet me vështirësi të konsiderueshme, pasi mjetet zjarrfikëse nuk janë të pajisura me shkallë të larta të nevojshme për operacione në objekte me këtë lartësi ekstreme. Aktualisht, ekipet e emergjencës po punojnë për lokalizimin e zjarrit dhe shmangien e përhapjes së tij në apartamentet e tjera. Shkaqet e këtij incidenti mbeten ende të paqarta. Sipas informacioneve të deritanishme, nuk ka raportime për persona të lënduar nga ky incident.