Gjatë paradites së sotme, një shtëpi në lagjen Kolovicë të Prishtinës është përfshirë nga flakët. Ngjarja ka ndodhur në rrugën Sheshi i Arbërit, pranë vendit të njohur si Bunari i Hajratit.
Drejtori i Zjarrfikësve në Prishtinë, Malë Gashi, njoftoi se informata për zjarrin është pranuar rreth orës 10:50. Ekipet e zjarrfikësve kanë dalë menjëherë në vendin e ngjarjes dhe kanë bërë të mundur lokalizimin dhe vënien e zjarrit nën kontroll.
Zëvendëskomandanti i Zjarrfikësve, Abdulsamed Shkodra, specifikoi se bëhet fjalë për një shtëpi njëkatëshe, ku dyshohet se vatra e zjarrit ka shpërthyer fillimisht në sallon. Sipas autoriteteve, nuk ka persona të lënduar nga ky incident. Megjithatë, janë shkaktuar dëme materiale në objekt.
Në lidhje me shkaqet që çuan deri te përhapja e flakëve, autoritetet bënë të ditur se ato mbeten të paqarta. Përcaktimi i shkaqeve të sakta do të bëhet pas përfundimit të hetimeve përkatëse që pritet të zhvillohen për këtë rast.