Një sipërfaqe prej 3.5 hektarësh pyje është përfshirë nga flakët në fshatin Janç Mal, pjesë e Njësisë Administrative Tunjë në Bashkinë Gramsh. Zjarri, i cili u evidentua gjatë ditës së djeshme, ka kërkuar një mobilizim të gjerë të strukturave vendore për parandalimin e përhapjes së tij.
Në operacionin e shuarjes janë angazhuar 8 punonjës të shërbimit zjarrfikës dhe 5 punonjës të shërbimit pyjor. Ndërhyrja është përballur me vështirësi të konsiderueshme për shkak të terrenit të thepisur dhe malor, i cili pengon hyrjen e mjeteve automobilistike. Për të mbërritur te vatra, ekipet kanë udhëtuar një orë me automjet dhe më pas kanë vijuar rrugën për një orë tjetër në këmbë, duke transportuar pajisjet e nevojshme në shpinë.
Duke qenë se ndërhyrja direkte është e pamundur, forcat në terren po përdorin teknikën e kundërzjarrit. Kjo metodë konsiston në krijimin e një zjarri të kontrolluar për të konsumuar lëndën djegëse përpara mbërritjes së frontit kryesor, duke krijuar kështu një brez të sigurt për frenimin e flakëve. Sipas raporteve, kjo teknikë po mbikëqyret nga komisari i zjarrfikësve Ilir Llapushi, duke u konsideruar si një praktikë rezultative për zonat e vështira të Gramshit.
Pas ndërprerjes së punës gjatë orëve të vona të mbrëmjes, ekipet u rikthyen në vendngjarje këtë të enjte, rreth orës 05:00, për të vazhduar përpjekjet për izolimin e plotë të vatrës dhe shmangien e zgjerimit të zjarrit në zona të tjera pyjore.