Një zjarr ka përfshirë një sipërfaqe pyjore në zonën e njohur si "Lëndina e Madhe", mbi fshatin Sinicë të Bashkisë Devoll. Pas marrjes së njoftimit për flakët, shërbimi zjarrfikës ka nisur ndërhyrjen e menjëhershme në terren për të vënë nën kontroll vatrat e zjarrit.
Në operacion janë angazhuar 11 zjarrfikës dhe 3 punonjës të shërbimit pyjor, të cilët vijojnë punën për neutralizimin dhe parandalimin e përhapjes së flakëve në zona të tjera të masivit pyjor. Aktualisht, nuk ka informacion mbi sipërfaqen e saktë që është përfshirë nga zjarri, ndërsa shkaku i rënies së tij mbetet ende i paqartë.
Ekipet e zjarrfikësve ndodhen në vendngjarje dhe po monitorojnë situatën në mënyrë të vazhdueshme. Ndërhyrja në terren vazhdon për të siguruar izolimin e plotë të vatrës së zjarrit.
Përditësime
Autoritetet konfirmuan se zjarri në zonën pyjore mbi fshatin Sinicë ka nisur gjatë mbrëmjes së 11 gushtit. Ekipet e emergjencës vijojnë operacionin për të vënë nën kontroll flakët në terrenin e vështirë malor.