Një vatër e re zjarri është shënuar mbrëmjen e sotme në fshatin Drenovë të bashkisë Mallakastër, duke shkaktuar alarm te banorët e zonës për shkak të afërsisë së flakëve me qendrën e fshatit. Pas njoftimit për situatën, shërbimet zjarrfikëse të Mallakastrës kanë mbërritur menjëherë në vendngjarje për të ndërhyrë në izolimin e vatrës dhe parandalimin e përhapjes së zjarrit në një sipërfaqe më të gjerë.
Aktualisht, autoritetet raportojnë se situata është drejt normalizimit, ndërsa vijon puna për monitorimin e zonës me qëllim shmangien e ndonjë riaktivizimi të flakëve. Deri në këto momente, nuk ka njoftime për dëme në banesa apo lëndime në njerëz. Shkaqet e rënies së zjarrit mbeten ende të paqarta dhe pritet të përcaktohen pas verifikimeve të mëtejshme nga autoritetet përkatëse.
Kjo ngjarje pason një tjetër incident të regjistruar më herët në bashkinë Mallakastër, ku një sipërfaqe me ullishte në fshatin Cfir u përfshi nga flakët, situatë e cila është neutralizuar plotësisht nga forcat operacionale.