Pasditen e sotme, ekipet e zjarrfikësve kanë arritur të vënë nën kontroll flakët që përfshinë Pyllin e Sodës në Vlorë, si dhe disa zona të tjera përreth. Operacioni për shuarjen e zjarrit ka qenë sfidues, ndërsa strukturat përgjegjëse vijojnë punën në terren për monitorimin e situatës dhe parandalimin e çdo riaktivizimi të mundshëm.
Ministri i Brendshëm, Besfort Lamallari, përmes një reagimi në rrjetet sociale, ka shprehur vlerësimin për punonjësit e zjarrfikësve, strukturat lokale dhe banorët vendas, të cilët janë angazhuar me përkushtim në këtë përballje.
“Orë të vështira në Vlorë për shkak të vatrave të zjarrit në Pyllin e Sodës dhe në disa zona të tjera. Ndjekim në çdo çast situatën në koordinim me të gjitha strukturat në terren që po punojnë për vënien nën kontroll të flakëve”, u shpreh ministri Lamallari. Ai theksoi se strukturat operacionale do të qëndrojnë në terren deri në normalizimin e plotë të situatës.
“Falënderoj çdo punonjës që po përballet me këtë situatë të vështirë me profesionalizëm dhe përkushtim. Mirënjohje gjithashtu strukturave lokale dhe banorëve vendas për angazhimin. Prioriteti ynë mbetet mbrojtja e jetës së qytetarëve, e banesave dhe e pasurisë natyrore”, deklaroi ministri Lamallari në mesazhin e tij.