Një vatër e madhe zjarri ka përfshirë një sipërfaqe të gjerë në territorin e Bashkisë Tepelenë, konkretisht në fshatin Dragot, duke shkaktuar dëme të konsiderueshme në pyje, ullishte, pemëtari dhe kultura të ndryshme bujqësore. Situata, e cila përshkruhet si serioze, ka vënë në gatishmëri të lartë autoritetet lokale dhe ato qendrore.
Në operacionin për shuarjen e flakëve dhe izolimin e vatrave po marrin pjesë ekipet e shërbimit të Mbrojtjes dhe Shpëtimit nga Zjarri (MZSH) nga Tepelena, Gjirokastra dhe Libohova. Ndërhyrja në terren mbështetet gjithashtu nga Forcat e Armatosura, të cilat po punojnë së bashku me forcat zjarrfikëse për të frenuar avancimin e zjarrit drejt banesave dhe për të mbrojtur pasurinë e banorëve.
Bashkia Tepelenë ka lëshuar një thirrje për banorët e zonës, duke u kërkuar atyre të tregojnë kujdes maksimal, të shmangin afrimin pranë vatrave të zjarrit dhe të zbatojnë me përpikëri udhëzimet e strukturave të emergjencës. Monitorimi i situatës vijon pa ndërprerje, ndërsa autoritetet janë shprehur mirënjohëse për kontributin e forcave operacionale dhe banorëve që janë angazhuar në përballimin e kësaj situate të vështirë.