Zyra e Rregullatorit të Energjisë (ZRRE) ka njoftuar shtyrjen e procesit të vendimmarrjes për daljen e konsumatorëve në tregun e hapur të energjisë elektrike, në kuadër të rregullimit të tregut.
Sipas njoftimit zyrtar, shtyrja vjen për shkak të nevojës për shqyrtim të detajuar dhe analizë të thelluar të të dhënave të paraqitura, si dhe vlerësimin e kostove të ndërmarrjeve të rregulluara. Si rrjedhojë, largimi i konsumatorëve nga shërbimi universal shtyhet deri më 1 maj 2026.
ZRRE sqaron se kjo nuk pengon konsumatorët e kualifikuar të ushtrojnë të drejtën për të dalë në tregun e hapur që nga 1 prill 2026. Ata mund të vazhdojnë procedurat e kalimit te furnizuesi i zgjedhur, sipas afateve dhe kushteve të legjislacionit në fuqi.
Autoriteti do të vazhdojë të monitorojë procesin dhe të njoftojë publikun, furnizuesit e palët e interesuara për zhvillimet e mëtejshme. Ky proces lidhet me liberalizimin gradual të tregut të energjisë në Kosovë.
Sa i përket numrit të kompanive, ZRRE ka paralajmëruar se vetëm 50 kompani do të kalojnë në tregun e hapur, ndërsa burime mediatike raportojnë rreth 111 kompanish.