13 vende të BE kërkojnë pastrim të legjislacionit evropian

Një aleancë prej 13 shtetesh anëtare të Bashkimit Evropian ka ndërmarrë një nismë për rishikimin sistematik të legjislacionit evropian, me qëllim lehtësimin e barrës administrative për bizneset dhe nxitjen e inovacionit. Dokumenti, i udhëhequr nga Austria, është nënshkruar nga Çekia, Danimarka, Gjermania, Estonia, Hungaria, Italia, Letonia, Lituania, Polonia, Portugalia, Sllovenia dhe Sllovakia.

Sipas këtij propozimi, vendet kërkojnë një vlerësim sektor pas sektori të ligjeve ekzistuese, për të përcaktuar nëse ato janë ende të domosdoshme, nëse kërkojnë përditësim ose nëse krijojnë barriera të panevojshme për ekonominë. Nënshkruesit theksojnë se legjislacioni nuk duhet të shihet si qëllim në vetvete, por si një mjet proporcional dhe koherent.

Ndër masat kryesore është krijimi i një "Viti Evropian të Zbatimit dhe Konsolidimit", i cili do të përqendrohej në shfuqizimin ose thjeshtimin e detyrimeve të dyfishta të raportimit. Gjithashtu, vendet propozojnë që çdo ligj i ri të shoqërohet nga një klauzolë rishikimi e detyrueshme të paktën çdo pesë vjet, për të verifikuar përmbushjen e objektivave të kërkuara.

Kjo nismë paraprin krijimin e një Aleance për Reduktimin e Barrës Burokratike, e cila synon të krijojë një rrjet të përhershëm për thjeshtimin rregullator në nivel kombëtar dhe evropian. Në dokument qartësohet se, ndonëse synohet reduktimi i dendësisë rregullatore, do të mbeten të pandryshuara mbrojtjet aktuale për shëndetin, sigurinë dhe të drejtat e punës. Propozimi mbështetet në parimet e subsidiaritetit dhe proporcionalitetit, duke kërkuar që veprimet në nivel të BE-së të ndërmerren vetëm kur ato ofrojnë një vlerë të shtuar që nuk mund të arrihet në nivel kombëtar.