Në nëntë muajt e parë të 2025-ës, në Kosovë u regjistruan 13 vetëvrasje, sipas të dhënave të Policisë së Kosovës. Këto raste lidhen me faktorë ekonomikë, socialë, psikologjikë, çrregullime mendore dhe mungesë vetëbesimi.
Qendra për parandalimin e vetëvrasjeve “Linja e Jetës” regjistroi 800 thirrje nga persona me mendime suicidale, 3-4 mijë chats dhe 160 thirrje të humbura për të njëjtën periudhë. Drejtori i saj, Bind Skeja, deklaroi se organizata përballet me vështirësi financiare dhe mungesë stafi, çka ka çuar në shkurtimin e orarit të shërbimit nga 14:00 deri në 2:00 në 18:00 deri në 22:00. Ai theksoi se në këtë kohë regjistrohen thirrjet më të shumta, me 3 mbikëqyrës, 5 operatorë dhe 20 operatorë vullnetarë.
Trajtimi në institucionet shëndetësore
Në Klinikën e Psikiatrisë të QKUK-së trajtohen çdo ditë persona me çrregullime psikike, përfshirë raste me ide suicidale. Drejtori Faton Kutllovci theksoi se trajtimi kryhet me kujdes të veçantë dhe vlerësim profesional për secilin rast. Ai apeloi që mediat të raportojnë me përgjegjësi, pasi raportimi i detajuar mund të ndikojë negativisht në shoqëri, veçanërisht te personat në gjendje të brishtë emocionale.
Kutllovci identifikoi sfida të tjera, si stigma ndaj vizitës te psikiatri dhe ndikimi i farmacistëve që e cilësojnë terapinë si të rëndë, çka çon në ndërprerjen e saj nga personat me mendime suicidale. Ai përmendi mangësitë e ligjit aktual për shëndetin mendor dhe faktin se një draft i ri i projektligjit ndodhet në fazën e konsultimeve publike.
Faktorë kontribues
Psikologu Kristian Halilaj shpjegoi se gjendjet e gjata depresive, humbja e motivimit dhe mendimet destruktive çojnë drejt krizash të rënda psikologjike. Ai theksoi nevojën për trajtim profesional dhe mbështetje psikologjike.