Xhuana Nikolli, 25-vjeçare nga Shëngjini i Lezhës, humbi jetën në Spitalin Universitar të Traumës (QSUT) në Tiranë pas konsumimit të fostoksinës. Ngjarja ndodhi një ditë më parë, ndërsa u dërgua me urgjencë në spital, por nuk arriti të mbijetojë.
Familjarët e saj paraqitën kallëzim në Komisariatin Nr. 2 të Policisë së Tiranës kundër partnerit Eraldo Fizi, 25-vjeç. Ata pretendojnë se ai ushtroi dhunë ndaj saj, veprim që dyshohet se e shtyu drejt këtij akti. Në trupin e saj dyshohen shenja dhune, të cilat do të konfirmohen nga autopsia në Institutin e Mjekësisë Ligjore.
Policia e Komisariatit Nr. 2 e ka shpallur Eraldo Fizin në kërkim për veprat penale dhuna në familje dhe shkaktimi i vetëvrasjes. Dyshohet se ai ushtroi dhunë ndaj të dashurës, çka rezultoi me konsumimin e substancës toksike nga ana e saj.
Sipas të dhënave, Xhuana Nikolli dhe Eraldo Fizi u martuan në qershor të vitit 2025, por u ndanë pas tre muajsh për shkak të konflikteve. Specialistët për Hetimin e Krimeve po punojnë për lokalizimin dhe kapjen e tij, si dhe për dokumentimin e rrethanave.
Përditësime
Familjarët e 25-vjeçares Xhuana Nikolli zbuluan në morg se ajo dyshohet se ishte shtatzënë.
- Dëshmitarët raportojnë episode të përsëritura të dhunës dhe përndjekjes nga partneri.
- Ajo u largua në Tiranë pas ndarjes, por ai e ndoqi atje.