Nga data 2 shkurt deri më 27 prill 2026 gjithsej 9532 qytetarë kanë paraqitur aplikime për rivlerësim të pronave. Sipas të dhënave të Agjencisë Shtetërore të Kadastrës, nga ky proces janë arkëtuar në buxhet rreth 1.6 miliardë lekë, ose afro 16 milionë euro, vetëm nga pagesa e tatimit 5%.
Në total për periudhën shkurt-prill agjencia ka përllogaritur arkëtime prej rreth 3.2 miliardë lekësh, ose afërsisht 34 milionë euro. Megjithatë tatimi është paguar deri tani vetëm nga 22% e aplikuesve, konkretisht nga 2114 qytetarë, me vlerë 1.59 miliardë lekë.
Rreth 53% e aplikimeve, ose 5053 raste, janë përllogaritur por tatimi nuk është shlyer ende. Ndërkohë 25% e aplikimeve, ose 2365 raste, janë refuzuar.
Aplikimet janë përqendruar kryesisht në Tiranë dhe Durrës. Tirana përbën 42% të totalit, ndërsa 18% i përkasin Durrësit, Kavajës dhe Krujës. Vlora përfaqëson 6%, Lezha 4.5%, Saranda 4% dhe Fieri 4%.
Në Tiranë rivlerësimi kryhet me çmimet e referencës të ndryshuara në vitin 2023 për 32 zona kadastrale. Në rrethet e tjera procesi vazhdon me çmimet e vitit 2016. Nëse qytetarët kërkojnë vlerësim sipas tregut aktual, procedura duhet të bëhet përmes ekspertit të licencuar.