Ligji "Për rivlerësimin e pasurive të paluajtshme", që ul tatimin nga 15% në 5% për diferencën mes çmimit të shitjes dhe atij të blerjes së pronave, hyri në fuqi më 22 janar 2026 pas botimit në Fletoren Zyrtare. Megjithatë, zbatimi nuk ka nisur ende për shkak të vonesës në miratimin e akteve nënligjore dhe çmimeve të reja të referencës për shitblerjen e apartamenteve në rrethe.
Burime nga Ministria e Financave sqarojnë se hartimi i akteve nënligjore për ligjin është përfunduar, ashtu si edhe ndryshimet në çmimet e reja të referencës. Këto dokumente janë dërguar për miratim në Këshillin e Ministrave. Zbatimi pritet të nisë paralelisht me këto çmime, të cilat do të shërbejnë si bazë orientuese në praktikë.
Ministri i Financave Petrit Malaj shpjegoi gjatë prezantimit të paketës fiskale 2026 se rivlerësimi i pasurive dhe metodologjia e re për çmimet e referencës (përjashtuar Tiranën) janë konceptuar për t’u zbatuar së bashku. Qëllimi është përrafrimi i vlerave të pronave me tregun, duke u mundësuar qytetarëve përfitimin nga norma e reduktuar tatimore.
Në korrik 2025, Ministria e Financave propozoi ndryshime në vendimin për çmimet e referencës, duke përfshirë ndarje të re të zonave kadastrale dhe përcaktim të çmimeve për zonat rurale për herë të parë.