Agjencia Kombëtare e Barnave dhe Pajisjeve Mjekësore (AKBPM) ka miratuar regjistrimin e ilaçit antitumoral Nilotinib Pharmascience, të prodhuar në Maltë, për shpërndarje në farmacitë shqiptare. Ky medikament u aplikua nga kompania Megapharma, në pronësi të biznesmenit Rasim Hamzaraj, me ndikim të Klodian Allajbeu.
Në maj 2024, Agjencia Europiane e Barnave (EMA) vendosi pezullimin e disa ilaçeve të testuara nga klinika indiane Synapse Labs, duke përfshirë Nilotinib Pharmascience. Vendimi bazohej në pikën 5 të raportit, që specifikonte se procesi i regjistrimit nuk duhej vazhduar për shkak të informacionit klinik të pasaktë dhe parregullsisë serioze në studimet klinike me të dhëna jo të besueshme.
Autoritetet rregullatore në vende të Bashkimit Europian, si Danimarka, Spanja dhe Franca, pezulluan ose refuzuan regjistrimin e këtij medikamenti për të mbrojtur shëndetin e popullatës, pas dyshimesh mbi sigurinë e tij.
Në Shqipëri, aplikimi i Megapharmës hasi probleme në fazën fillestare. Në qershor 2025, analizat laboratorike për seritë G0404C dhe G0405C rezultuan të papranueshme, duke ndërprerë procesin e regjistrimit. Megjithatë, në tetor 2025, AKBPM lejoi zëvendësimin e mostrave fillestare me të reja dhe vazhdoi procedurën, pavarësisht rezultateve negative dhe vendimeve të EMA-së.
Ky zhvillim ndodh në kontekstin e aspiratave të Shqipërisë për anëtarësim në Bashkimin Europian, ku standardet rregullatore evropiane shërbejnë si referencë.